AR insawn tur pualin hun hmang
admin 15-Mar-2025 06:02 PMVawiin (15.3.2025) tlau khan Sector 23 HQ Assam Rifles, Khatla-ah Aizawl khawpui laili atanga Zokhawsanga Assam Rifle-te insawn tur pualin Union Home Minister Amit Shah hoa hun hman a ni.
Amit Shah chuan, 'Kum sawm thum panga vel zet Mizo mipuite duhaisam lo ni tawh thin, Aizawl khawpui laili atanga Zokhawsanga Assam Rifles sawn chhuah chu kan lo tihlawhtling dawn ta. He hmalakna hi Assam Rifle Camp sawnna a ni satliah lo a, Aizawl duhawm zawk a awm theih nana hmalakna a ni. Mizoram mipuite ka lawmpui a, tangkai taka in hman ka duhsak che u a ni,' a ti.
He hmalakna hi kum1890 a Aizawla sipai an awm tirh atanga vawiin inkara Aizawl hmasawnna tura thutlukna chhinchhiah tlak ber a tlinga a rin thu sawiin Amit Shah chuan, 'Hei hian Prime Minister Pu Narendra Modi kaihhruai sawrkarin Mizo mipuite duhna a ngaihpawimawhzia leh in tana a inhawnzia a tilang a ni,' tiin a taka a hlawhtlin theih nana theih tawp chhuaha hmalatu Chief Minister Lalduhoma leh Lt. Gen Vikas Lakhera, DG AR-te chungah a lawm thu a sawi.
