Jeje-a'n bengdar a sem

A bial chhunga hun hmang mek South Tuipui Bialtu MLA Jeje Lalpekhlua chuan nimin (15.4.2025/ khan MLA Office Hnahthialah a bial chhunga beng tha lo mi 20 te hnenah MLA Fund atanga a lei bengdar a sem a, hemi hnu hian MLA Office-ah vek hian a duh apiangte dawr theih turin a thu nghal.

Bengdar semna inkhawmah hian thu sawiin Jeje Lalpekhlua chuan, 'Kum upa lam beng leh mit tha lo hi a tam em em a, hei hi chu upat hri pawh a ni pakhat ve bawk. Heng mit tha lo leh beng tha lote tan hian theihtawp chhuahin hma kan la a, hmanni lawkah pawh special eye clinic kan nei tawh a, tunah beng lama harsatna nei te tana hma kan la leh thei hi a lawmawm hle. Tun hi a tawpna tur ni lovin chhunzawm zel tur a la ni dawn a ni,' tiin bengdar mamawh ten an mamawh ang chiah chiah an neih theihna atana buaipuitute chungah  lawmthu a sawi.

He hunah hian bengdar dawngtu thenkhat pawhin lawmthu an sawi.

Hemi hnu hian 29th South Tuipui Bialtu MLA hi Hnahthial-a MLA Office-ah thuin, Hnahthial khawchhung leh khaw pawn tan amah dawr theihna hun hawn a ni. Amah dawrtute mamawh hi Hnahthial-a chinfel sak theih chu chinfel sak nghal zel niin a then chu Aizawl lama buaipui chhunzawm tur a awm.