MHIP khawmpui CM-in a hmanpui

Vawiin (22.4.2025) chhun khan Chief Minister Lalduhoma chuan Vanapa Hall-ah Mizo Hmeichhe Insuihkhawm Pawl (MHIP) General Assembly vawi 24 na chu a hmanpui a, thutawp siamna reng reng pa kut a nih thu sawiin, chhungkuaah rorel tum lo turin a chah.

Chief Minister chuan, MHIP hian mipuite zirtir leh rawngbawl hna a thawk nasa thin tih sawiin, 'Swardhar Greh leh One Stop Centre kan kalpui theihna kawngahte an thawh hlawk hle. Ka bial, Serchhip District-ah chuan Sub HeadquartersMHIP ten Swardhar Greh enkawl hna hi an thawk thin a, Beti Bachao Beti Padhao Scheme kalpuinaah sawrkar an thawhpui tha thin hle. Fahrah chawmna in 'Hmangaihte Run' in nei a, dan ang thlapa fa lak pawh kalpuiin, in zarah fahrah tam tak ten nu leh pa an neih phah a ni. In hnathawh that avangin kum 2016 khan Ministry of Women & Child Development, Government of India, chuan Nari Shakti Puruskar lawmman a hlan che u a nih kha,' a ti.

Sawrkarin hmeichhiate kan ngaihsakzia kan tihlanna langsar tak pakhat chu, a hmasa ber atana hmeichhe cabinet minister kan nei hi a nih thu sawiin Lalduhoma chuan, 'Tha taka in lo thawhpui kan beisei. Mizoram hi India rama hmeichhiate dinhmun that berna zinga mi a nih a rinawm a, kan hmeichhiate hi kan state thawhchhuahah in inrawlhthuk hle. Kan hnam nunphungah hmeichhiate hi zah taka enkawl in ni thin tiin, a tilang chiangtu chu kan tawng kauchheh hi a nih thu a sawi.

Chief Minister chuan tunah phei chuan kawng tam takah mipate pawhin hmeichhiate kan tluk tawh loh thu sawiin, 'Amaherawh chu, mipate rorelna hnam kan ni. Chhungkuaah hmeichhiaten an pasalte thu an ngaichang thin tur a ni. Thutawp siamna chi reng reng chu pa kut a ni. Pasal nikhua lo tak, rawn tlak ngang loh in nei a nih ngawt loh chuan nuin chhungkuaah rorel lo tum suh u. In pasalte kha finchhuah ula, an mawi lohna laite hliahkhuhin timawi zawk rawh u. Chu chu nupui tha zia a ni. Zo nun ze mawi a ni satliah lo va, Pathianin nupuite awm dan tura a ruat a ni,' a ti.