Raltlan hruaitute kokhawm

Central YMA chuan vawiin (20.6.2025) tlai dar 2 khan CYMA Hall-ah Myanmar atanga rawn raltlan hruaitute a kokhawm a, infuitharna hun an hmanpui.

CYMA Vice President Prof. Lalnuntluanga kaihhruai infuihtharna hunah CYMA President Lalhmachhuana chuan, 'Mizorama raltlante dinhmun chungchangah infuihthar tulin kan hria a; boruak muanawm tak hnuaia kan awm theih nan mahni camp-ah theuh lo infuihthar ang che u,' tiin hnam bil leh chi bil boruak siam lo turin a chah.

CYMA President chuan raltlante chu kan unaute an nih angin harsatna an tawh leh puih an ngaihnaah YMA chuan a puih zel tur thu leh a thlahthlam dawn loh thu a sawi.

Aizawl DC Lalhriatpuia chuan sawrkar inkaihhruaina hrang hrangte a sawi a, CID (SB) SP Stephen Lalrinawm chuan India citizen-te chauhin an neih theih Adhaar Card, driving  licence etc. te neih tum lo tur leh ruihhlo a sumdawnna a inhnamhnawih lo turin a chah.

VL Vura Ralte Asst. Commissioner, Excise & Narcotics Dept. pawhin raltlante chu ruihhlo a inhnamhnawih lo tur leh ruihhlo do kawnga thawhpui turin a sawm a ni.

CYMA Gen. Secretary Prof. Malsawmliana tarlan danin, Myanmar atanga sahimna zawnga awm mekte hi mi 27,751 an ni. Raltlante chuan sawrkar ruahman angin temporary ID Card nei vek tur a ni.

He hunah hian Aizawl leh Mizoram hmun hrang hranga raltlan camp- a awm hruaitute, raltlan pawl hrang hranga hruaitu leh Chin Hills- a MP leh MLA-te engemaw zat an te.