ZPM-in an term an hman zawh ring lo an awm - Lal Thanzara

MPCC chuan vawiin (20.6.2025) chhun khan an office-ah chhung inkhawm an hmang a, thusawitu MPCC President Lal Thanzara chuan ZPM-in an term an hman zawh ring lo an awm thu leh kan CM hlui leh Kamrul-a combination a that thu a sawi.

Lal Thanzara chuan MNF Sawrkar laiin ‘thluaka sum lut’ tih leh ‘Kamrula’ tih a lar em em tih sawiin, 'Kan CM hlui leh Kamrula combination kha ‘sweet combination’ an ti hial a ni. Kan airport-a Kamrula hnathawh pawh kan CM hlui khan Inrinni tin a enpui thin an ti a, chutichung chuan a nih tur ang a ni pha lo hle,' a ti.

ZPM enchhin sawrkar a lo piang leh tih sawiin MPCC President chuan, 'An campaign laiin thil tha tinreng min tiam a, VIP culture nuaibote thlengin min tiam. Mah se, an insawi loh ang zelin an awm a, sawi sawi ngai loin mipuiin an hria. ‘Kum 15 daihin kawng kan siam ang’ an ti a, thla khat pawh daih lo kawng an siam,' tiin tuilet hnua kawng chhiat ber tum Mizoramin kan tawn mek thu a sawi.

ZPM hian kan ti ang an tih an ti lo fai vek nia sawiin Lal Thanzara chuan, 'VIP culture tihbo, restricted tender tihbo, sawhthing lei zawh vek, VUC-in minister corrupt tur a veng ang tih te, thil tam tak min tiam a nih kha. Duh se ,chuan ZPM hian thil tha tih theihna hun an nei tha ber a, mithiam te, celebrity-te leh mi tha tak tak pawh an nei, mahse tumna tak tak an nei lo. Mi thenkhat chuan an term pawh an hman zawh an ring lo hial tawh,' a ti.

MPCC President chuan Congress Sawrkar lai khan NLUP hmangin mipuiten malsawmna tam tak an dawng tih sawiin, 'Eizawnna bul an tanna tur te an dawng a, remna leh muannate a thleng a, sawrkar hnathawkte thla a muang a, ram thenawma kan unaute thlengin an thla a muang thin. Chu chu mipuite tuhrah a ni. Mipuite pawh hian an ngaihtuah chian a ngai,' tiin kan tuhrah kan seng thin avangin uluk taka kan ngaihtuah a ngaih thu a sawi.