Kawng an dan hnuah thil zuar leh

Inrinni apianga Aizawl Tennis Court bul vela thil zuar thinte thil zawrh, nimin (21.6.2025) a Aizawl Municipal Corporation (AMC) in a sengkhawm hnuah tlai dar 5 vel atangin thil zuarte hian an thil zawrh mipui lei theih turin an pho chhuak leh. Nizan dar 9 thleng khan buaina leh harsatna nei loin kawngpui dungah an thil zawrhte an thut pui.

Treasury Square leh Tennis Court chhehvela thilzuarte hi  Aizawl bakah Aizawl khaw pawn lam, Sihphir, Lungdai, Saikhamakawn, Mel 3, Maubung leh Sesawng mite an ni hlawm a, mahni thlai thar zuar eng emaw zah an awm laiin, khar chhawnga zuar pawh eng emaw zah an awm.

AMC hian March 27, 2025 khan thuchhuah siamin, Mizoram Legislative Assembly, Dak Inpui, FCS & CA Office, Agriculture Office, Horticulture Office leh Tennis Court chhehvel kawng kamah thil zawrh a khap. Henglai hmuna thil zuar thinte chu AMC Multi-Complex Building, Tuikual South-ah insawn vek tawh turin a hriattir.

AMC hian May 8, 2025 khan thuchhuah siam lehin, an tarlan danin Mizoram Legislative Assembly Building leh a chhehvel hi Section 308 of the Mizoram Municipalities Act, 2007 hmangin thil zawrh khapna hmun a puan a ni a, khauh taka kenkawh chhunzawm a ni ang.

Thu awih loa dan bawhchhiate chu Rs. 5,000/- thleng chawitir leh an thilzawrhte man sak an ni dawn Thupek hi bawhchhe lo turin thil zuarte ngen an ni.

Nimin zinglam khan heng laia thil zuarte bungrua chu AMC chuan police thachakna nen a sengkhawm sak. Thil zuarte chuan lungawi lohna lantirna atan hian zing dar 9:30 vel atangin kawng an dang a,  AMC chu mirethei rahbet tuah puhin thiah an duhthuin an aurual a, 'AMC vawi tam kan dil a, min phal sak lo,' an ti.