MZU-ah Indian Road Congress

Vawiin (20.6.2025) chhun khan 233rd Indian Road Congress Mid Term Council hawn inkhawm MZU Auditorium-ah buatsaih a ni a, Chief Minister Lalduhoma'n a hawng. Union Minister of State for Ministry of Road Transport & Highways (MoRTH) Harsh Malhotra chu khualzahawm a ni.

Chief Minister chuan Mizoramin airport pakhat leh rel kawng pakhat chauh a la neih avangin kawngpui hi kan nitin chak lakna hnar, kan innghahna a nih thu sawiin, 'Chutihlaiin kan road density chu kilometre za bialah kilometer 46.37 chauh a la ni (46.37 kms per 100sqkm), India ram kawngpui density chawhrual (national avarage) chu 116kms per 100sqkms a ni thung. Kan dinhmun a la hniam hle. Kawngpui kan mamawh belhna a la sanzia chu khawtin atang hian an lo leh huan panna kawngpui laihsak dilna hi a lo lut chur chur reng mai. Thingtlang khaw mawngping kan tih ang chi, an khaw thenawmte nena inkalpawhna la mamawh pawh kan ngah hle,' a ti.

Mizoram chu fur ruahtui dawng tam ram a nih avangin National Highway-te chu rigid pavement-in siam thei zawk ila a duhthu sawiin Lalduhoma chuan, 'A siamna man a lo sang deuh a nih pawhin a enkawl zuina man a tlem ve thung a, a tlo em em a ni. Sum leh pai senso hi khuareiah a tlem zawk ang. Tin, international ramri thui tak nei kan nih avangin kan National Highway-te hi strategic road-ah puang ila, chak zawkin hna kan thawk thei ang a, kan ram tan a tangkai zawkin ka ring,' tiin Mizorama National Highway enkawl dan tha zawk nia a ngaih a sawi.

Mizorama National Highway sial hnathawktuten leivung paihna (spoil banks) an hman that tawk loh thu leh environment leh loneituten an tawrh nasat thu sawiin, tun hnuah chuan tha taka kalpui zel tawh turin a chah a, 'Kawngpui siam thar ni si, chhe hma leh lutuk, fur khat pawh daih lo va siam a ni thin chu tihbo ka duh. Kawng kual a la tam lutuk chu a ngaihmawh awm. Hmun tam tak chu sum sen belh lutuk lo va ngil taka sial theih nia a ngaih thu te, kawngpuiin kawrte a kanin kawrtea hume pipe dah thlak a, a chung chu leia hnawh khah a, kawngkamah hmuhma thar tha tak tak siam belh zel mai thain ka hria," a ti.

Harsh Malhotra pawhin thusawiin, 'Mizoram hi ram mawi tak a ni a, mipuite pawh hmuh an nuam a, sawrkarin min lo dawnsawn danah pawh ka lawm hle. Kawngpui tha neih hi kan ram ei leh bar hmasawnna nen a inzawm tlat. Central Sawrkar hian a ngaipawimawh a, hma a la nasain hmachhawp pawh a ngah hle. Thingtlang lamah pawh hmalakna hi kan zauh zel dawn a ni. Kawngpui tha leh tlo kan neih theih nan Indian Roads Congress hian mawhphurhna pawimawh tak a chelh,' tiin khawvel ram dangte el phak a kan quality kan tihsan a, kan leilung, sik leh sa leh ram awm dan azir zel a hmanrua leh design tha kan ngaihtuah chhuah zel a ngaih thu a sawi.

Indian Road Congress hi India rama engineer zawng zawng, sawrkar, company leh mimal hnuaia thawk leh thawk lote pawh an tel vek theihna, highway engineering a pawl lian ber (apex body) a ni a. India rama road, bridge leh tunnel engineering kalpui dan tur standard tinreng duangtu niin, kum 1934 a din a ni. Tun tum hi Mizoramin Indian Road Congress khawmpui a thlen tum lina a ni.