HISSLAM-in badge dum an bel

Higher Secondary School Lecturers Association, Mizoram (HISSLAM) ni 13.8.2025-a general body meeting an neiha an thurelte an ngaih pawimawhzia lantirna atana enhran bik nia an inhriat avanga an lung dam lohzia lantirna atan vawiin (18.8.2025) atangin badge dum bel chungin sikul an kal a, badge dum hi ni thum chhung an bel dawn.

HISSLAM thurelte :

1. Kum 1997 hnu ah HSS zirtirtu atan direct recruitment neih a ni ta lo a, hei hian zirtirtu indaih lohna  mai bakah zirnaah a tha lo zawngin nghawng a nei chho zel a, HISSLAM Gen. Hqrs.-in thuneitute hnenah vawi tamtak he harsatna chungchang a thlen hnu pawhin hmalakna tak tak a awm thei lo hian HSS ngaihthah a nih zia a tarlang in kan ngai. Post ruak kan neih te hi regular a hnawhkhah vat a ṭul kan ti.

2. HSS hnuaia contract lecturer-te hi hun rei tak lo thawk tawh leh, he hna an lakna ah pawh kan state in recruiting agency a neih sang ber MPSC kaltlangin, interview/examination hmanga dan tlawhchhan mumal taka lak te an ni. Hetihrual hian anmahni dahngheh na tur dan 'The Mizoram  Regularisation of Contract Employees scheme,2008'chu '100 point reservation roster for  regularisation of employees engaged on contract basis, provisional employees and work-charged employees' chuan a rawn luahlan leh ta a. He 100-point roster hi keini School Education Department hnuaia higher secondary school; 1997 hnu lama direct recruitment vawikhat mah nei tawh lote tan a tha lo em em. Direct recruitment nei nasa department dangte leh hna lak dan inang lo (nature of recruitment) tak te nen min hrut rual ta vek mai hi pawi kan tiin, hemi chungchang min ngaihtuahsak tur leh HSS a contract a thawk mekte pawh, an luh tirh a dan hman anga min ngaihtuahsak turte a vawi duailo kan thlen te pawhin hmasawnna a hmu thei miahlo hi HSS zirna ngaihthahna ah kan ngai a ni.

3. School timings, uniform policy leh academic calendar-te hi education professional leh academician-ten, department chhungah; board emaw committee din a uluk taka ruahmanna an siam tur chi niin kan ngai. Hetihlai a public opinion/poll hmanga zirna in leh thawktute chungchang kan chai ta mai hi zirna leh thawktute tan thil tha ber a ni loah kan ngai.

4. Kum 2024 August thla atang khan HSS zirtirtu ten transfer notification tum 5 zet kan hmu tawhin, a dawngtu tak turte ah a thlen hmain social media-ah hmuh hmasak a ni ta fo mai hi tha lo kan ti. Hetianga mass transfer leh, hemi boruak avang hian kum khat tehmeuh chu HSS zirtirtute hi rilru nghet pu thei lo leh chiai tak in kan awm ta. Hemi chungchang min chinfel sak tur leh National  Education Policy(NEP) 2020 behchhanin transfer policy mumal leh langtlang tak min siam sak turin kan hotute pawh kan ngen nghal a ni.