MZP ngaih a tha lo

MZP chuan thuchhuah siamin, nizan (August 18, 2025) hnamdang Mizoram luh tumte'n Mizoram Vairengte ILP Check Post-ah buaina an siam tih tarlangin, 'Kan duh lo takzet. Nimina vai lo luh tumte hi ni dang aia tam fe an nih avangin kan ngaih a tha lo. Assam Sawrkarin Bangladesh Muslim illegal migrant hnawhchhuah an kalpui avangin Mizoramah vai an tam taah kan ngai a, uluk leh huaisen taka che turin Mizoram Sawrkar kan ngen a ni,' an ti. 

Hemi chungchangah hian, vawiin  khan MZP chuan Home Minister K Sapdanga chu a office-ah hmu nghalin nizana thil thleng hi an sawipui tih tarlangin MZP chuan, 'Assam-in dan loa an rama awmte an hnawhchhuah mek hi Mizoramin kan tawrh theih avangin ramriah sipai leh police tam zawk duty dah tur leh Assam atanga lo lut turte chu uluk taka an document-te check tura an duh thu kan thlen. Central Armed Police Force (CAPF) Sipai lak chhuanlam a dan lova vai an lo luh loh nan theih tawpa inven a tul thu pawh kan thlen a ni,' tiin Home Minister hian theih tawp chhuah a tum thu leh duty pawh an uluk thu a lo hrilh tih an tarlang.

MZP tarlan danin, August thla chhungin mi 2,573 hnenah ILP pek chhuah niin nimin khan mi 544 hnenah pek a ni a, August thla chhunga ILP pek chhuah hi chawhrualin mi 140 bawr vel zel a nih lai a, nimina mi 544 zet an lo lut thut hi an ngaih a tha lo a ni. Tunhma atanga kan hnam himna tura MZP-in tha a lo thawh tawh thin dan angin harsatna lian zâwk a thleng a nih chuan MZP chuan kan hnam himna atan theihtawp a chhuah leh zel dawn a, kan tunlai boruak awm mek hi Mizo mipuite pawhin ngaihven a, sorkar hmalaknaah leh he thilah hian beng lo chhi ve turin Mizo mipuite an ngen.

MZP Headquarters, Sub-Headquarters leh Branch-te chuan vawiin atang hian ILP pek chhuahnaah a theih ang angin duty-te an tawiawm ve nghal dawn a ni.