Mibo thiin an hmu

Ni 5.9.2025 atanga chin hriat loha awm Henry Lalnunsanga (35) s/o B Kapliana, Kulikawn Veng, Aizawl chu thiin hmuh a ni.

Henry Lalnunsanga hian ni 5.9.2025 khan scooter (scooty) in Aizawl atangin Serchhip a pan a, ni 6.9.2025 zingah a scooter hi Chhiahtlang hmarlam dai, khua atanga kms. 2 vela hla Tuial kawr bulah kawngsir-ah hmuh a ni.

Scooter-ah hian chabi a in vuah a, a piah deuhah helmet leh a bag ni ngeia hriat chu hmuh leh a ni. Ni 8.9.2025 khan YMA hruaitute chuan an enfiah. A document atangin a chhungte biakpawh niin nimin khan Aizawl lam atangin a chhungte hi an chho a ni.

Hetianga amah an hmuh tak loh avang leh phone hmang pawha biak pawh theih a nih loh avang hian nimin (9.9.2025) khan Chhiahtlang Hmar Veng Branch YMA member-te chuan bo zawn hna hi an thawk nghal.

Phone signal hi police-te chuan chhui zuiin Hmuntha lamah a awm nia hriat niin, bo zawngte hi an kal bakah Hmuntha khaw mite pawhin a theih angin an lo dap nghal. 

Vawiin (10.9.2025) chawhma 10:45 vel khan Henry Lalnunsanga ruang hi a helmet an hmuhna atanga metre 600 vel, kawngthlangah thiin an hmu. Police-in a tul ang an buaipui mek.