CM Hulhliap Centre a tlawh

Vawiin (10.9.2025) chawhma khan Chief Minister Lalduhoma chuan Mizoram Sorkarin PPP Mode-a Synod Camping Centre, Neihbawia a kalpui Hulhhliap Short Stay Centre a tlawh a, Social Welfare Minister Lalrinpuii'n a tawiawm.

Chief Minister chuan kan ramah ruihhlo vanga harsatna tawk kan tam avangin sorkar chuan tun leh tuna kan mamawh ber nia ngaiin Hulhhliap Short Stay Centre kalpui thain an hriat thu sawiin, 'Sorkarin amah maia a tih theih loh avangin YMA/MHIP leh Synod-te phungbawma sawmin PPP mode-in a kalpui ta ni. Ruihhlo ngaite chu an nghei theih nan kan tanpui a ni satliah lo va, a nghei hlenten eizawnna an neih theihna turin skill training changkang tak kan pe nghal a. Hetiang taka ruihhlo ngaite enkawlna kalpui hi a dang sawi tur a vang viau mai thei. A sim duh tak takte tan chuan tun hun tluka hun tha hi a awm lo,' a ti.

Hulhhliah SSC hi tum khata mi 150 zel enkawl theihna tura duan ni mah se, diltu an tam avangin batch hmasa berah mi 256, batch hnihnaah mi 544 leh batch thumna, tuna kalpui mekah hian mi 208 admit an ni. Batch khat hi ni 20 chhung zel niin a tir lam ni 10 chhung detoxification kalpui a ni a, a dawt ni 5 chhung chu rilru lam enkawlna (psychological counseling) atan hman niin, a bak ni 5 chu Synod Revival Department bultumin camping neihzui thin a ni. An chhuah hnuah Referral Task Group ten thla thum chhung an thli thlai zui a, ruihhlo laka fihlim zuite tan skill training kalpui leh a ni.

Skill training-ah hian food processing ah mi 11 an training chhuak tawh a, training hi a taka tihchhin (practical) nena kalpui zel a ni. Electrical technician hi mi 28 in an zir mek a, alluminium fabrication hi mi 18 in an training mek. National Skills Qualification Framework (NSQF) Government of India in a duan ang thlapin training hi pek an ni. Mizoram Council for Vocational Training hminga certificate pek vek tum a ni. Batch hmasa ber leh a dawttua lutte an chhuizuinaah vawiin thlengin zaa sawmsarih leh pali (74%) te chu ruihhlo lakah an fihlim zui zel tih hmuhchhuah a ni.