Neihloh khua sawn a ni dawn

Vawiin (10.9.2025) chhun khan Chief Minister Lalduhoma, Bialtu MLA hoin a office-ah a bial Neihloh khaw thar tura duan (proposed plan) chu official pawimawh leh Neihloh khawtlang hruaituten an enho.

Neihloh khaw thuthmun hi leilung chhiatna thleng thei lakah a him tawh loa, kumin fur pawh hi an tuar nasa hle. Hetiang dinhmuna an din avang hian an khawtlang chuan a khaw ram chhung, tuna an khaw thuthmun thlenhma deuhah hian khaw thar kai mai an duh a ni. Sorkar atanga hmasawnna hnathawhna tur sum an hmuhte pawh khaw thar atan an dah deuh zel tawh a ni.

Chief Minister kaihhruaina hnuaiah khaw thar tur ruahmanna hi Town & Country Planning, UD & PA chuan an siam a, vawiin hian an thlirho ta a ni.

Town & Country Planning Asst. Director Lalhruaitluanga Ralte chuan Neihloh khaw thar, chenna in 108 leh sorkar hmunhma pawimawh eng emaw zat awm theihna tur plan an siam a sawifiah a, 'A hmunhma hi a rang lama sam fai ni se, hmalak bul tan theih chi apiang chu tan mai ni se,' an ti.