Minister-in bal zirbingna a tlangzarh

Vawiin (10.9.2025) chhun khan Health and Family Welfare Minister Lalrinpuii chuan a office-ah bal chungchang zirbingna 'Research on Phytochemical Constituents & Galactagogue Properties of Colocasia Esculenta (Taro) and Determination of its Nutritive Value' report bu a tlangzarh.

He zirbingna hi Laithangpuii College of Pharmacy faculty leh research team-ten kum khat chhung ngawrh takin an bei a ni. Mizoram University, Mizoram Food Processing Research and Training Centre, RIPANS te leh NIPER, Guwahati-ten technical support an pe.

He research hian a tum ber chu balah hian nu hnute tui ti tam theitu compound-a awm dan zirchian a ni. Compound awm zawn chhuah nan Preliminary Phytochemical Screening leh Liquid Chromatography- Mass Spectroscopy hman a ni a, Nutritional Composition hi Association of Official Analytical Chemists in an recommended method hmangin an zawng. Compound hmuh chhuah zir chian nan computer-based study ah hian Schrödinger Software hman a ni.

He zirbingna in a hmuhchhuah tlangpuite chu: balah hian compound thenkhat alkaloids, flavonoids leh glycosides a awm tih hmuh a ni Heng compound te hi mihring tana chakna a thlen theih piah lamah nu hnute tui a ti tam theia ngaih a ni. He compound-te hi thendarh a, zirchiannaah chuan natural compound Luteolin 6, 8-C-diglucoside a awm tih hriat a ni a, computer-based studies neihnaah he compound hi mihring taksaa receptor-ah a bei thei a ni tih an zir chhuak. Chu chuan hnute tui a ti tam thei tura rin a ni.

Bal chhum hi Zemabawk Veng chhunga nu hnute tui pe lai mi sawmthum hnenah 100 gram in nitin thla hnih chhung pek a ni. Hemi chhung hian kar tin survey neih ṭhin a ni a, chu tah chuan 57 % in an hnute tui a tipung tih hmuh chhuah a ni a, hnute tui nei ngai lo pathum zingah pakhat in a neih phah.