Supply Minister-in weighbridge a hawng

Food, Civil Supplies & Consumer Affairs (FCS&CA) Minister K Lalrinliana chuan nimin (11.2.2023) zing khan Muanna Veng Kudama FCS&CA Department-in SEDP sum hmanga  buhfai phur motorte a buhfai chawpa bukna  khawl (digital weighbridge) metric ton 60 thleng buk theihna a hawng.

K Lalrinliana chuan digital weigh bridge chu a man tam lo mah se, ration buhfai semchhuahna kawngah khawl pawimawh leh tangkai tak, hun leh tha tlem zawk senna tur buhfai bukna khawl a nih avangin khawl tangkai tak a ni dawn tih sawiin, Weighbridge hman thin kha a hlui tawh avangin sawiselna tak tam a awm a, chuvangin department chuan a thlakna tur hi SEDP kaltlangin a ruahman a ni, a ti.

Ration buhfai buk dik leh rang taka mipuite hnena pek chhuah anih theih nan FCS&CA Department chuan truck chawpa buhfai bukna tha leh awlsam digital weighbridge hi a bun thar a ni. 

Muanna Veng ah  hian a tirah digital weighbridge 60 MT capacity pahnih dah tum a ni a, a hmunhma hi a chep deuh avang leh mamawhna a awm ve tho avangin pakhat zawk chu PDC Luangmual Lunglei ah dah ve tura tih a ni ta zawk a ni. Weighbridge pahnih cheng nuai 21.68 man niin, a hmun hmate buatsaih nan khawl man bakah sum sen a ni.