Sum buaia buai pawi ti

Mizoram BJP chuan vawiin (17.11.2023) chhun khan an office-ah political session an hmanga, thusawitu Mamit Biala BJP candidate Lalrinliana Sailo, Ex. Assembly Speaker chuan sum buaia buai pawi a tih thu a sawi. 

Lalrinliana Sailo chuan Mamit Bialah BJP official candidate niin an hotute duhsakna changin hma an han lak thu sawiin, 'Nimahsela Mamit Bial hi sumdawn nan an hmang emaw tih mai tur khawpa a awm hi a pawi takzet. Inthlana nasa taka sum buai a kan buai ta hi a pawitak zet zet a ni. Hetiang a nih avang hian mipuite pawh hi kan ṭhanharh a hun tawh takzet. Inthlan laia sum tlem kan duh vanga kan ram hmalam hun tur pawh ngaihtuah thei loa kan awmna hian, Mizoram hmalam eng kan neihtheih loh phah thin. Nakina kan hnathawh tur pawimawh tak takte hi kan ngaih pawimawha kan thlir a hun tawh zawk a ni,' a ti.

Kum 2024 ah pawh central-ah BJP an la sorkar dawn tih chu mithiamte sawi dan ni a sawiin Lalrinliana Sailo chuan, 'Mizoram budget tinung thar tur hian central-a la sorkar tur party, BJP bawk hi min khaichhuaktu atana pawimawh tak a ni, ' tiin  Modi-a hmalakna ropui tak 'Make In India' chuan India ram hmasâwnna nasa takin a thlen thu a sawi.

Lalrinliana Sailo chuan tun hma zawngin ṭhalai lehkhathiam leh talent nei ṭha tak takte chu foreign ah hna thawk turin an liam thla zut zut ṭhin tih sawiin, 'Tuna infrastructure, industry, healthcare leh IT Hub ah India-in hma a sawn hnuah chuan India ram chuan nasa takin hma a sawn a, ṭhalai lehkhathiam, talent nei ṭha te chuan kan ramah ngei hna an thawk sup sup tawh. India ram aṭangin foreign-ah kan ram siamchhuah thawnchhuah a ni ta zawk. Economy-ah nasa takin India ram chuan hma a sâwn ta zawk a, he hmalakna hi a ropui tak zet a ni,' a ti.