Hnam issue pawimawh ngaihthahah ZPM puh

MNF chuan vawiin (14.10.2024) khan an office-ah chhung inkhawm an hmang a, thusawitu MNYF President Robert Romawia Royte, MLA chuan Mizo hnam issue pawimawh ngaihthahah ZPM Sorkar a puh.

Mizoram leh Myanmar inkara zalen taka inkalpawh phalna free movement regime (FMR) hlih chungchang te, Myanmar ramri hung chungchang te, thenawm ram leh state atanga Mizo raltlan ngaihven chungchangah te, Assam nena ramri chungchangahte sorkar anga Mizo hnam humhalh a tul em em laiin ZPM Sorkar chuan mipui beisei angin hma ala lo nia sawiin Robert Romawia Royte chuan, 'CM zahawm takin vairam media thleng thleng a dawih aw a chhuah hi a pawi tak zet,' a ti.

MNYF President chuan Mizo khaw hlun tak Phuldungsei khuaa mi 85 te Mizoram ration card atangin ZPM Sorkarin a paih chhuak nia sawiin, 'A serious takzet. Heng Phuldungsei khuaa India ram dan anga an ration card leh Adhaar card online a link vek tawh a ni,' tiin Adhaar card nen an ration card nen online-in zawm leh vat turin a phut.