Midday meal buatsaih thei dawn lo

Mizoram Middle School Teachers' Association (MSTA) leh Primary School Teachers' Association (MPTA) chuan School Education Director hnenah lehkhathawnin, October 18, 2024 atang chuan zirlaite tan chaw chhun (midday meal) an buatsaih theih tawh dawn loh thu an thlen.

MSTA leh MPTA chuan an lehkhaah hian September 17, 2024 khan an hotu zahawm tak Education Minister hnenah an harsatna tawh an thlen tawh tih tarlangin, 'I hnenah pawh hmai chhana kan sawipui tawh che ang khan kan harsatna sutkian a la ni lo,' an ti.

Cook-te honorarium chu April leh May, 2024 an dawng tawh tih tarlangin MSTA leh MPTA chuan, 'Kan lawm hle. Amaherawhchu kan harsatna ber cooking cost leh cook honorarium kan mamawh ang kan la dawn loh avangin hreh tak chungin midday meal hi October 18, 2024 hnu lam atang chuan kan buatsaih thei tawh dawn lo tih kan hriattir a che,' tiin, midday meal buatsaih tawh loh a ngaih lohna atan an harsatna October 18, 2024 ral hma-a sutkian sak turin School Education Director hi an ngen.