Zu khapna dan kalpui dan tur sawiho

Vawiin (18.6.2025) chhun khan Planning & Programme Implementation Committee Room-ah Mizoram Liquor (Prohibition) Amendment Act 2025 kalpuina tura hmachhawp hrang hrang Mizoram State Policy Coordination Committees (MSPCC) Chairman Dr. KC Lalmalsawmzauva, Adviser to Chief Minister kaihhruaiin sawiho a ni.

Sawihonaah hian MSPCC member-te bak ah Excise & Narcotics Department, Commerce & Industries Department, Horticulture Department, Food & Drugs Administration, All India Wine Producers Association, Department of Food Technology, Mizoram University leh wine siamtu aiawhte an tel a ni.

Dr. KC Lalmalsawmzauva Mizoram chhung ngeia thei tharchhuah hmanga, thianghlim leh mumal taka wine siamchhuah a nih theih nan Mizoram Liquor (Prohibition) Amendment Act 2025 chu duan a nih thu a sawi a, 'Thei tharchhuaktute tan inhralhna tha zawk buatsaih sak te, hemi kawnga hma la tura entrepreneur hip nan te, zin mite hip nan leh dan leh tehfung hrang hrang behchhan chunga thianghlim taka wine sawngbawl a nih theih nan hemi kaihhnawih sawrkar department hrang hrang te, winery neitute leh kuthnathawktute tanrualna a pawimawh,' a ti.

Excise Commissioner Z Lalhmangaiha chuan Mizorama zu khuahkhirhna lo kalpui tawh thin dan leh Mizoram Liquor (Prohibition) Amendment Act 2025 danglamnate a lem nen a sawifiah.

Food & Drugs Administration atangin wine leh beer kaihhnawiha Food Safety and Standard Authority of India hnuaia inkaihhruaina hrang hrang ngaihthlak niin, wine-ah chuan ethyl alcohol chu za zelah 7 - 15.5 a nih tur thu leh beer-ah chuan za zelah 5 - 8 a nih tur thu tarlan a ni.

Hmalakna hlawhtling taka kalpui a nih theih nan thei chi khat, a huhoa hmun khat a chin (Cluster approach) a pawimawh tur thu te, a sawngbawl kawnga endikna kalpui dan tur te, a sawngbawltu turte leh zuar turte phalna (license) pek dan tur te sawiho a ni. Winery lam a tui, bultan tumte leh winery-a thawk tur ten thiamna rintlak an neih theih nan training buatsaih sak thin ni se,  an ti.