Mipui sum thawhkhawm sem chhuak

LPS Vision Production leh Youth Icon 2024 top 10 te tangkawpin khuarel chhiatna tuarte tana charity concert an buatsaiha mipui sum thawhkhawm chu Icon star-te'n an sem chhuak.

Youth Icon top 10 te chuan nimin (18.6.2025) atang khan tanpuina sum hi an sem chhuak tan. Vaivakawn Local Council hnenah Rs. 1,50,000 an hlan a, heng sumte hi Vaivakawn Zohnuai, thlanmual bula lei khi avanga an chenna in rauhsan a, YMA Hall-a cheng lailawk chhungkaw 10 hnenah nimin vek khan hlan nghal a ni.

Youth Icon 2024 top 10 te chu vawiin khan tanpuina sum hlan turin Serchhip-ah an feh chhuak leh a, Icon star te hian tanpuina sum Rs. 3,00,000 chu Sub-Hqrs. YMA Serchhip Secretary Zonunsanga Kawlni leh Fin. Secretary H. Lalbiakhlua te kutah an hlan.

YMA hruaitute leh Youth Icon Top 10 aiawh mi palite chuan veng paruk - Dinthar Veng, Saron Veng, Field Veng, P&E Veng, Chhim Veng leh Chanmari Veng-a vanduaina tawkte chu kal chilhin tanpuina sum hi an hlan a, chhungkaw 20 te chu Rs. 15000 theuhin tanpuina an pe.

Serchhip Sub-Hqrs. YMA chuan hetianga LPS Vision Production leh Youth Icon 2024 Top 10 ten khuarel chhiatna tuarte tana charity concert an buatsaih chu ropui an tih thu leh mipui sum thawhkhawmte Serchhipa vanduaina tawkte hnenah an hlan chu lawmawm an tih thu an sawi a, hemi atana sum thawhtute leh branch hrang hranga lo buaipuitute chungah lawmthu an sawi bawk a ni.

LPS Vision Production leh Youth Icon 2024 top 10 te chuan June 7, 2025 zan khan ruah sur nasa avanga khuarel chhiatna tuarte puihna turin charity concert an buatsaih a, vehbur an khawn atanga mipui sum thawhkhawm tling khawm chu cheng nuai 6.6 chuang a ni a, heng tanpuina sumte hi khuarel chhiatna tawk nasa khua leh vengahte sem chhuah a ni.