Tang tlan chhuak bike hman an hmu

Ni 15.6.2025 zana Central Jail atanga tlan chhuak Lalthawmthanga (28), Zonuam Veng, Aizawlin tlanbona atana a bike hman chu nimin (17.6.2025) khan Pawlrang daiah hmuh a ni.

Thulaknain a tarlan danin, Pawlrang dai kilometre 3 vela hlaah Lalthawmthanga'n tlanbona atana a hman bike hi hmuh a ni a, Ngopa Police hriattir nghal niin, Ngopa Police Station-ah bike hi an la nghal a ni.

Bike hi  Lalthawmthanga nau ta a ni a, Lalthawmthanga hian Lengpuia an huan atangin bike chabi hi a nute a chhuhsak ni-a thudawn a ni. Lalthawmthanga tlanbona bike hi hmuh ni mah se, amah erawh hmuh a la ni lo.

Tarlan tawh angin, ni 20.12.2024 atanga Central Jail-a tang Lalthawmthanga hi ni 15.6.2025) zan khan jail atangin a tlan chhuak.

Prison Department atanga Bengvarna thudawn danin, Lalthawmthanga hi ruihhlo vanga man niin, court-in a thubuai a ngaihtuah mek lai a ni. Amah hi a hriselna dinhmun avangin midang zing dah loin isolated ward-ah an dah.

Blanket leh mau hmangin jail bang hungnaah a lawn liam a, a tlan chhuak tih a tuk dar 6 vel khan hriat a ni. Prison Dept. chuan Zonuam PS-ah FIR an thehlut.