Wildlife guard-te'n hlawh la lo rei

Environment Forest & Climate Change (EF&CC) Minister Lalthansanga'n wildlife guard-te a thla biin hlawh an pek tawh tur thu sawi mah se, wildlife guard-te hian thla hnih hlawh an la tawh lo.

Bengvarna thudawn danin, wildlife guard-te hian April leh May hlawh an la tawh loa, June a ral leh tep tawh avangin an mangang tawh hle. Wildlife guard hi Mizoramah mi 300 vel an awm.

Assembly Session-ah EF&CC Minister chuan wildlife guard-te hlawh chu central atanga lokal a nih avangin an hmuh tlai thin thu sawiin, 'Budget thar atang chuan a thla biin kan pe ang. State pawisa kan hmang puk ang a, an pawisa tur a rawn kal hunah kan rul leh ang,' a ti.

An dinhmun hrethiama thla bia hlawh an lak theihna tur Finance Minister-in a remtihsak avanga an lawm takzet thu sawiin Lalthansanga chuan, 'An batna thinte pawhin bat an phal tawh lo, an pe har thei lutuk. Hna dang an thawk thei si lo,' tiin an dinhmun hrethiam taka thil tih a nih avangin an lawm em em thu a sawi.