Khuh damdawi thahnem tak an man

Lunglei Police-te chuan ni tunhnai khan khuh damdawi thahnem tak leh a neitua puh Lalrinthangi 53), Lunglei Electric Veng nia inchhal an man.

Lunglei Police atanga Bengvarna thudawn danin, Lunglei Police-te chuan Lunglei khawpui chhung damdawi dawr thenkhatah an licence phak baka khuh damdawi kawl thin leh licence nei loa black-a zuar/kawl thin an awm thuan teivahna vela an sawi thin an hria a ni. A tlangpuiin heng khuh damdawite hi Aizawl atanga lo thleng thin a nih thu leh courier-ah leh sumo service velah an in thawn thin niin an sawi.

Tichuan courier a, thawk ve thin (mutia) pakhat chu source-ah siamin, ani chuan an rawn thawnna parcel chu a hriat thu police-te a hrilh. June 4, 2025 zing dar 6:30 vel khan courier service bungraw unload-na hmun Bazar Kikawnah an va en thlithlai ta a, hetah hian auto pakhat chuan a phur ngei niin an hria a, chu auto rickshaw chu parallel road lamah tidingin, tu bungrua tur nge a phur sak tiin an zawt a ni. 

Auto rickshaw khalhtu chuan Lalrinthangi ta anih thu a sawi a, tichuan an in a thlenpui thleng chuan an umzui (locate) a ni. A neitute inah a dah lut a, auto fare-te an inpek fel vel awmah chuan police an lut ta a, khuh damdawi neitute pawhin an ta ngei a nih thu leh an chhungkaw pa ber pawh khuh damdawi addict niin, a nupui hian a hralh thin thu a sawi.

Khuh damdawi neitu Lalrinthangi hnen atang hian bur 131, Rs.19,650/- man hu vel chu an man a ni. Lalrinthangi hi thubuai an siam sak.