Music Travel Love press conference
admin 18-Jul-2024 07:34 PMNaktuk (19.7.2024) zana LPS Arena, Falkland, Aizawla concert tur YouTube lama band ngaihven hlawh tak 'Music Travel Love' (The Moffats) chuan zanin dar 6 khan Hotel Ransam, Thuampui Vengtharah press conference an nei.
Music Travel Love chuan Mizo artist tha an awm chuan thawhpui an chak thu sawi a, Mizoram Youth Commission-in zai intihsiakna an buatsaih Perhkhuang star Daniel Lalawmpuia a aw mawi an tih thu an sawi a, 'Hmalam hunah thawhpui nge kan la duh,' an ti.
Clothing brand NoEx an neih thu sawiin Music Travel Love chuan, 'Kawr leh lukhum a lei theih dawn,' tiin hmalam hun thui tak thlir loa, nuam ti taka hun hman an duh tih nitina hriat thar tirtu tur atana clothing brand hi din an nih thu an sawi.
Music Travel Love hian vawiin chhun khan Reiek Tlangah thing phun pahin, an music video thar tur 'Love will keep us alive' shooting an nei nghal.
Music Travel Love member-te hi Bob Moffatt leh Clint Moffatt te niin, The Moffatts band-a mite kha an ni. Concert-ah pawh hian 1990s leh 2002 chhoa an hla larte pawh an sak tel ngei a rinawm.
