Ground Water Irrigation Project

Irrigation & Water Resources (IWR) Minister C Lalrinsanga chuan tukin (14.4.2023) khan PMKSY-Har Khet Ko Pani project kaltlanga siam, Mizorama buh leh thlai chawm nana leihnuai tuiverh hmalakna (Ground Water Irrigation Project) hmasa ber ni turin Tuipui (Mualbuhvum) Ground Water Irrigation Project (GWIP) chu Champhai leilet Mualbuhvum hmunah a hawng.

C Lalrinsanga chuan Mizoramah ground water irrigation project kalpui dan turte uluk taka zirchian hmasak thin a nih thu sawiin, 'Tlangram leh phaizawl dinhmun a inchen loh avangin ngaihtuahna sen ngun bik a ngai a ni. Leihnuai tui chim chin ground water table North East-ah a that avangin hmalakna awm chhunte a hlawhtling deuh zel hi a lawmawm,' a ti.

IWR Minister sawi danin, Mizoramah ruahtui van tla, a sur dan, leilunga hip luh leh luanral dante, boruak hnawm dan leh thli kal dante, ni sat dan leh lui tui luang zatte zirchianna National Hydrology Project (NHP) Real Time Data Acquisition System (RTDAS) Mizoram hmun 53 ah bun a ni a, paruk dang bun leh mek a ni.

India ram hi khawvel puma leihnuai tui tling (groundwater) hmang nasa ber a ni. Groundwater hman nasatna ber chu irrigation sector niin, groundwater hman zawng zawng atanga 89% chu irrigation atan hman a ni. Mizoramah chuan irrigation atan groundwater hman a la ni meuh lo a, Groundwater Irrigation Project 13 Mizoram hmun hrang hrangah a vawi khat nan kalpui mek a ni a; hengahte hian senso 90% chu Sorkar Laipuia Department of Water Resources RD&GD, Ministry of Jal Shakti-in a tum a, 10% chu state-in a tum thung a ni. 

Heng project 13 thawh nan hian cheng nuai 1604.89 ruahhman a ni a, Sum ruahman zawng zawng hi sanction kim a la ni chiah lo nain, project 4 thawh zawh tawh a ni. Tuipui Ground Water Irrigation Project hi a hmasa ber atana hawn a ni.

Tuipui (Mualbuhvum) Ground Water Irrigation Project atana sum ruahman hi cheng nuai 99.10 a ni. DPR hi central guidelines leh norms hmanga siam a nih vangin tui verhna leh tui pump chhuahna bakah tui sem darhna tur canvas pipe 200 rm te hi project component tlangpui chu a ni. 

Tuipui GWI project-ah hian tubewell 15 verh a ni a, heng tubewell 15 te hi solar pump pali leh electric pump 11 te hmanga tui lak chhuah a ni. Heng tubewell 15 zinga parukte hi department drill rig hmanga verh a ni a, a dang pakuate hi private driller-te verh tir an ni.

Tubewell-te hi 150 mm Diameter a zaua verh a ni a, casing pipe thun nghal zel niin casing pipe atan hian PVC hman a ni. Heng tubewell 15 te hi feet 150 a thuk an ni tlangpui a, minute khatah tui litre 15-20 vel a pump chhuak thei a ni. Heng tui pump chhuahte hi canvas hose pipe hmanga sem darh a ni. A chawm tur ram (CCA) zau zawng hi hectare 31 niin, chhungkua 52 ten chhawr thei tura beisei a ni.