Sava leh thehlei kaphlumtute jail-ah

Dy. Conservator of Forest (DCF), Aizawl chuan Wildlife (Protection) Act, 1972  bawhchhia-a silai (air rifle) hmanga sava chi hrang hrang 142 zet leh thehlei chi hrang hrang pasarih tihlum tute mi pathum  -Lalchhuanawma (33), HS Tlangkhuma (68) leh Lalthazuala (41), Tlungvel khua vekte chu court-a hruai an nih hnuah nizan (12.2.2024) khan Central Jail-ah dahluh an nih thu a tarlang. 

Sava leh thehlei an tihhlumte chu - Tukkhumvilik- 108; Vahui 10; Tuklo - 10; Kawlrit - 10; Vate - 2, Kulherh - 1, Liandorit - 1, Hlei-kapsen - 3, Hlei-lubial - 2 leh Hlei-meipar - 2 te an ni.

 Ni10.2.2024 khan EF&CC Department hnuaia Seling Forest Range leh Tawi Wildlife Sanctuary staff-te chuan joint patrolling neiin a chunga hming tarlante khi Tlungvel khaw daiah an sava leh thehlei kah hlumte bakah an kah hlumna hmanruate nen zan dar 9 velah an nangching  a ni.

An sava leh thehlei kah hlumte bakah an kah hlumna hmanruate hi man sak nghalin hemi zan hi Inrinni zan a nih avang leh a tuk Pathianni a nih avangin nimin Aizawl Wildlife Division Office-ah in report tura hriattir an ni a, hemi ni vek hian magistrate hmaah hruai nghal niin Central Jail-ah dah luh nghal an ni.

Hmanrua man sakte hi Air Rifle - 2 leh a mu box -1, SBBL-1 leh a mu 15, Hand pump (Air Pump) - 1 te an ni. An Sava leh Thehlei kahna hmun hi Phulmawi ram, Zawngsih hmun niin a kap tute hian an sawi na a, Tawi Wildlife Sanctuary hnaih lam a nih avangin sanctuary chhung a mi a nih leh nih loh chhui chian mek a ni.