Sorkarin magisterial inquiry a din
admin 30-Sep-2024 06:12 PMMizoram Sorkar chuan ni 21.9.2024 zana Durtlang Leitana insawisakna thleng chungchang chhui chiang turin magisterial inquiry a din.
Durtlang Leitana thil thleng chungchang hi sorkar chuan chhui chian ngei tula a hriat avangin vawiin (30.9.2024) hian Aizawl District Magistrate chuan magisterial inquiry din a nih thu leh a chhui chiang tur hian Aizawl District Addl. Magistrate Mark Lalthanliana ruat a ni tih a tarlang. Mark Lalthanliana hi ni sarih chhunga report thehlut tura tih a ni.
Mizoram Police tarlan danin, Dr. Laldinliana Sailo, Zemabawk North, Aizawl a miin Bawngkawn Police Station-a complaint a thehluh danin ni 21.9.2024 zan dar 11 leh ni 22.9.2024 12 inkar khan amah leh a thiante pahnih, Dr. Rinngheta Renthlei s/o Dr. R.L. Sanghluna, Durtlang leh Lalthlamuana s/o P.L. Ropara, Durtlang Mel-5 te chu Durtlang Leitan-ah mi tu tih hriat loh ten kut an thlak rawn a, an lu leh hmaiahte hliam an tuar a ni.
A tibuaitute hian an lirthei aṭangin kuttuarte hi an hnuk chhuak a, Dr. Rinngheta chu leiah paih thluk niin bawhbeh a ni a, midangin a luahte lo chhirin, a kawr pawh pawh thler sak vek a ni.
He thil thleng hi hriat a nih veleh police-te chuan thil thlenna hmun Durtlang Leitan hi an pan nghal. Dr. Rinngheta t-shirt thler pawh hi Lalthlamuana hnen atangin lak a ni. Misualte sawisak rawn hliam tuar mi pathumte hi uluk takin thu zawh fiah an ni a, an hliam tawh dan pawh Synod Hospital, Durtlang-ah uluk taka endik niin Dr. Laldinliana Sailo leh Dr. Rinngheta Renthlei-te chuan hliamna tak an tuar a, Lalthlamuana erawhin vanneihthlak takin hliam na tak a tuar lo thung.
Investigating Officer hmalakna chak tak avangin he thubuaia thil tisualtua puh mi paruk - 1), Lalmalsawma Zote (25) s/o Vanlalruata Zote, Ramhlun North, 2) Mark Zairemmawia (24) s/o Lalsiamkunga, Ramhlun North, 3) Lalvenpuia (22) s/o Rinchungnunga, Ramhlun North, 4) Sailianpuia Sailo (28) s/o Lalremruata Sailo (L), Venghlui, 5) Vanlalpekhlua (23) s/o H. Thangzela (L), Ramhlun North leh 6) K.Vanlaltharzela (23) s/o K. Ramengmawia, Ramhlun North te chu nimin (September 23, 2024) khan man nghal an niin, an lakah Bawngkawn PS Case No.309/24 Dt.23.09.2024 u/s 117 (2)/115(2)/3 (5) BNS ziahluh nghal a ni. An thil tihsual hi in-bail theih (bailable) a nih angin an vai hian bail in chhuah lailawk an ni leh tawh a ni.
Thil tisualtua puh zinga pakhat C/266 Sailianpuia Sailo (28) s/o Lalremruata Sailo (L), Venghlui hi Police tanglai, tuna Aizawl DEF hnuaia Sairang Police Stationa thawk mek niin, a chungchangah disciplinary proceeding kalpui nghal a ni a, Superintendent of Police, Aizawl District thupek No. E/RO/PF/C-266/2024/917 dated 24th September, 2024 angin tunah hian a hna atanga chawlh lailawk tir (suspend) nghal a ni.
Indian Medial Association, Mizoram State Branch leh Synod Hospital doctor-te chuan he thil thleng chhui tur hian magisterial inquiry din ngei an phut a ni.
