Ram surrender awm belh

Aizawla Assam Rifles ram huam chhunga LSC nei zingah tunhnai khan mi pakhatin sorkarah a ram a surrender leh a, ani nen hian mi 14 in ram an surrender tawh.

Bengvarna thudawn danin,  tun hnai khan AR hmuna ram nei Lalmanliana chuan a ram chu sorkarah a surender. Lalmanliana ram hi hmun thuma thena hmun hnih chu AR hmun chhungah a awm a, hmun khat erawh AR hmun pâwnah a awm. AR hmun pawna awm chin chu LR&S Department chuan LSC an siamsak a, Lalmanliana hnenah an hlan tawh. 

AR hmunah hian ram nei mi 54 an awma hriat a ni a, an vaiin sorkarin insawifiah tura hriattirna (show cause notice) a pe. Mi 54 zinga mi 51-in show cause notice an chhang a, pathumin an chhan loh avangin ram an nei tawh loa ngaih an ni. Hetih lai hian, mi 11 chuan court-ah sorkar an khing mek.

Tarlan tawh angin, May 5, 2025-a Chief Minister Lalduhoma hoa Assam Rifles Ram Advisory Committee thukhawm chuan AR ram chhunga ram nei mimal, pawl leh kohhrante chu an ram pass-te sorkara hlan let vek tura ngen ni se, an ti. Ram neitu thenkhat court-a sawrkar khing mek te pawh an thubuaite hnukkir tura ngen an rel.