Zirtirtu transfer order cancel phut

Lungtian Joint Coordination Committee chuan thuchhuah siamin, Govt. Modern High School, Lungtian a thawklai H Lalhmingmawia transfer order sut a nih loh chuan zirlai leh zirtirtute sikul kal tur an dan bakah, national highway (NH) an dan chah tur thu an tarlang. Lungtian khua hi Lawngtlai District niin, Sangau khaw bula awm a ni.

H Lalhmingmawia transfer order hi sut turin ni 19.5.2025 khan Education Minister leh Education Director hnen ah ngenna thlen tih tarlangin Lungtian Joint Coordination Committee chuan, 'Vawiin thlenga kan ngennaten awmzia a la nei lo hi hriatthiam har kan tiin khawtlang mipui zah lohnaah leh zirlaite hmakhaw ngaihlohna ah kan ngai.

Lungtian Joint Coordination Committee tarlan danin, H Lalhmingmawia hi Govt. Modern H/S atanga transfer a nih chuan mathematics zirtirtu an awm loh mai bakah regular teacher pakhat chiah a awm tawh dawn. Tuna regular teacher awmchhun hi natna khirh tak nel lai a nih avangin Govt. Modern H/S kal zel dan tur hi a khirh hle.

Govt. Modern H/S hian hun reitak atang tawh khan headmaster nghet, UDC, IV grade leh chowkidar-te pawh nei loin, tun dinhmunah thawktuten an thla hlawh thawhkhawmin chowkidar an in chhawr. Sawrkarah pawh an harsatna leh mamawhna hi vawi tam tak an lo thlen tawh thin. Chutih mek lai a, Mizoram Sawrkarin mathematics teacher leh regular teacher an neihchhun a lak chhuah sak hriatthiam har an tiin, pawi an ti takzet a ni.

Bialtu MLA Dr. Lorrain Lalpekliana Chinzah hun chhunga hetiang thil a thleng hi pawi an ti takzet tih tarlangin Lungtian Joint Coordination Committee chuan, 'A rang thei ang bera transfer order hi sut a nih theih nan a hma min laksak turin kan beisei,' an ti.

Sawrkara an ngenna anga an zirtirtu neih that ber H Lalhmingmawia transfer order hi ni 31. 05. 2025 ral hma ngei a cancel a, a post ngai a dah a nih loh chuan Lungtian khawtlangin transfer an rem ti lo a ni tih lantir nan Joint Co-Ordination Committee huaihawtin zirtirtu leh zirlaite sikul kai tur dangin, total band huaihawtin national highway an dan chah tur thu Lungtian Joint Coordination Committee chuan an tarlang.