Ruihhlo ngaite chungchangah inrawnkhawm

Ruihhlo ngawlveite enkawlna pakhat atana short stay centre (SSC) din chungchangah inrawnkhawmna (consultative meeting) chu Social Welfare Minister Lalrinpuii hoin (May ni 26, 2025) tlai Aijal Club Conference Hall-ah neih a ni. Inrawnkhawmna hi Department of Social Welfare Department-in tunlai Mizoram boruak thlir chunga an buatsaih a ni a, MYC Chairman Malsawmzuala Ralte pawhin telpui.

Social Welfare Minister chuan ruihhlo tihrem tuma kawng hrang hranga hmalakna kal zelah ruihhlo ngawlvei mekte enkawl chu thil pawimawh tak a nih tel thu leh state mamawh lian tak a nih avanga hemi kawnga ngaihtuahna sen a tul thu a sawi a, 'Social Welfare Department chuan hemi kawnga mithiam leh tawnhriat neite nen a inrawnkhawmna neih tha a tih anga he hun hi buatsaih a ni,' a ti.

Inrawnkhawmnaah hian Mizorama ruihhlo ngaite enkawlna hrang hrang leh an tun dinhmunte tarchhuah niin, rehabilitation centre/home piah lamah chutiang hmun piah lama ngawlveite lo enkawl hmsakna tur atan SCC mi tam zawk lenna leh hmun khat mai ni lo din mamawhna leh harsatna awm theite sawiho a ni.

SSC hi din ngei tha tiin, a kalpui dan tur leh enkawl zui dan tur te, hmalak dan tur ngaihtuah tura Core Committee leh Task Group te din ni se tih a ni. Social Welfare chu hma latu tura ruat an ni.

Social Welfare Director Dr. Lalhriatzuali Ralte chuan department-in zirchianna a lo neih tawh tarlangin, awmze nei taka ruihhlo ngawlveite enkawl tur chuan hun rei tak a duh a,a lo ber ah thuang thum de-addiction, rehabilitation leh after care kalpui a ngai a thla engemawt hun a duh thu sawiin, 'Tuna kan dinhmuna kan mamawh hmasa ber ah chuan SCC hi siam a, detoxification tih phawt a, an hriselnate endik leh eitur tha pek niin, counselling-te pek an ni ang. Chumi atan chuan SSC hi hman a ni ang a, mithiam enkawlna hnuaia kalpui tur a ni. Ruihhlo ngaite chu ni 15 vel hetianga SSC ah enkawl an nih hnuah rehab centre emaw, camping hmun te emaw, IRCA etc ah te enkawl zui leh a tul. Chung hmun an chhuahsan hnu ah pawh an taksa leh rilru dinhmun azira medical leh psychological care follow up tih bakah after care tih chhunzawm a tul a ni,' a ti.

He inrawnkhawmnaah hian AMC, Aizawl DC Office, DH&ME, MSACS, Excise & Narcotics, I&PR, Nursing, Ayush, Mizoram Home Guards, SP Aizawl, MPRO, Mental Health Nodal Officer, bakah pawl hrang hrang - Druggist & Chemists Association, FINGODAP, Mizoram Psychological Association, Mizoram Professional Social Workers Association, Shalom leh Synod Hospital aiawhte an tel.