Lungdai YMA-in fair lo an ti

Lungdai Branch YMA chuan thuchhuah siamin, Inter Branch YMA Football Tournament, 2025 a an chak loh dan chu fair lo an ti a, a chak loh tuma match official-te ngaihdam dil turin an phut.

Ni 22.5.2025 khan Rajiv Gandhi Stadium, Mualpui a Armed Veng South Branch nen round of 16 an khelh tuma an chak loh danah Armed Veng South Branch-te lakah lungawi lohna engmah an nei lo tih tarlangin Lungdai YMA chuan, 'Match official-te chungah erawh kan lung a dam lo hle a ni. Kan lungawi loh zia lantir nan Lungdai Branch YMA committee chuan press release neih ngei tha kan ti a, heng a hnuai amite hi kan thil phutte an ni,' a ti.

1) Keini Lungdai Branch-te chuan Armed Veng South Branch nen kan inkhelh tum a match official pali (4) ten dik lo tak leh lâi lo tak maia kan inkhelh an enkawl ang hi midang chungah a thlen ve tawh loh nan match official palite chungah MFA hian hma min lak sak ngei turin kan phut tlat. Tin, he inkhelhah hian match fixing a awm leh awm loh oranising committee-ten min chhuichhuah sak turin kan phut a, a lo awm ngei a nih chuan match official-te hi MFA hian an license cancel sak turin kan phut tlat a ni.

2) Kan players naupang rual, a thente phei chu vote pawh la neilo, hma hun eng tak tak neite rilru hetiang tak mai a tihnualtu leh ti beidawngtute (match official palite) hian press release emaw official letter hmangin emaw an thil tih dik loh chungchangah Lungdai Branch YMA leh khaw mipuite lakah ngaihdam an dil hi kan phut tlat a ni.

3) Tunlai khawvel changkannain min chenchilh tawhna hunah, hetiang ang official kan lo la awm zel hi thingtlang mi te tan chuan a beidawnthlak kan tiin CYMA tan pawh a mualpho thlak hlein kan hria. Tun hnu leh zelah hetiang thil hi a thlen tawh loh nan organizing committee leh MFA-te dik taka rorel turin kan phut bawk a ni.

Thlalak : Lungdai YMA Football Team