Chinfel sak thuai se kan duh - MNF

MNF chuan thuchhuah siamin, ZPM kaihhruai sawrkar hnuaiah zirtirtu sawn kual avanga Mizoram kil tina harsatna awm leh khawtlangin buaina an tawh a tam ta hle tih tarlangin, 'Pawi kan tiin, chinfel sak ni thuai se kan duh takzet a ni,' an ti.

Zirtirtu indaih lohna hi a bik takin thingtlang lamah a nasa hle nia tarlangin MNF chuan,  'Khawpui lamah zirlai tlemte awmnaah zirtirtu indaih taka an awm laiin, indaih lohna hmun zirlai ngah tak tak thingtlang a mite chhuhsak an ni fo mai hi hriatthiam har tak a ni. Tunhnaiah khaw tam takin indaih lo taka zirtirtu an neih mekte a hnawhkhahna siam sak ni si loin, khawpuiah sawn luh an awm reng mai. Heng avanga thingtlang lam mangangin an zirtirtu sawnchhuahte kal chhuah phal loa, lungawi lohna lantir thawm hmuhtur a awm zurzut mai hi zirna lamah kan sawrkarin thingtlang mite a ngaihthah zia lantirnaah kan ngai,' tiin zirthiamna mamawh em em thingtlang mipuite hmasawn tir kan sawrkar hian a duh loah pawh an ngaihthu an tarlang.

MNF chuan ZPM sawrkar tantirh atangin buaina thawmin Zoram a tuam tan nia tarlangin, 'Chawl lovin tun thleng in, buainain Zoram hmuntin deuh thaw a luah. A changtu Minister hian tihngaihna a hre tawk lo nge, chinfel tumna a nei duh lo tih hi MNF zawhna a ni. Nitin zirna dawn mamawh ve tho thingtlang zirlaite mamawhna chhang turin ZPM sawrkar chu a rang thei ang bera hma la turin kan phut. Mipui hnena chhiah tam tak an khawn belh ur ur hmang hian zirtirtu indaih lohna avanga harsatna awm teuh hi chingfel thuai turin kan phut takzet a ni,' an ti.