Bana Kaih Scheme Phase-II tlangzarh

Mizoram Sawrkar Flagship Program 'Bana Kaih Scheme Phase II' chu vawiin (19.9.2025) chhun khan Irrigation & Water Resources Department Auditorium-ah Adviser to Chief Minister Dr KC Lalmalsawmzauva'n a tlangzarh. CM Special Package-a dawn tur zawt tih hniam a ni.

Dr. KC Lalmalsawmzauva chuan Bana Kaih Scheme chuan, a pung sawrkarin a rulhpui tura loan pek chhuah leh kuthnathawktute thlai thar lei sak mai bakah hmasawnna tak chang tura taimakna, tumruhna leh rinawmna nei tura inzirtirna (moral reforms) te, sum enkawl dan tha (financial literacy) inzirtirna te, internet hman tangkai inzirtirna (IT literacy) te leh eizawnna rintlak dinna tur ruhrel tha siamte a ken tel thu sawin, 'Tanpuina dawngten hlawhtlinna an chan ngei theihna turin, an hmalakna kalpui dan en zui tur, 'Monitoring Team' ten uluk takin an vil zui zel dawn,' a ti.

Planning Secretary Lalmalsawma Pachuau tarlan danin, Bana Kaih Scheme Phase -I kalpui chhung khan loan component dilna 11,439 dawn atangin 702 chu loan dawng tura pawm an ni. Heng loan pek tura pawm tawh zawng zawng belh khawm hi cheng vbc. 76.35 niin chawhrualin mi phakhat hnenah loan hi Rs. 10,87,000 ang zela pek chhuah tur a ni. An dilna bank azirin tunah hian loan hi sem chhuah mek a ni a, PMEGP portal siamthat avangin loan pek chhuah hi a khawtlai phah.

Phase-I ah khan Chief Minister's Special Package diltu mi 29,571 te dilna chu a changtu department-a thawktuten uluk taka an endik hnuah, mi 2,258 te hnen ah pek a ni. Sum pek chhuah belhkhawm hi cheng vbc. 18.33 a ni. Bana Kaih Scheme Phase-II ah hian Implementing Department 19 an awm tawh dawn a, dilna felfai taka thehluh a nih theih nan DPR Software siam a ni tawh. Mi tam zawkin tangkai taka Bana Kaih Scheme hi an hmalakna tih changtlun nan leh tihhmasawnna atana an hman theih nan Chief Minister's Special Package chu Rs. 50,000 thleng pek theih tura thlak danglam a ni.