Minister-in Lal Zakapa film tlangzarh

Mizo lal ropui leh huaisen, Lal Zakapa Fanai biographical film chu vawiin (11.7.2024) chawhnu dar 1 khan Cultural Centre & Auditorium, Vaivakawnah Social Welfare & Tribal Affairs Minister Lalrinpuii'n a tlangzarh.

Lalrinpuii chuan Mizo lal huaisen leh ropui, a khua leh tui leh Mizo hmeichhiate zahawmna leh dikna humhimtu chanchin, documentary film a buatsaih a ni chu lawmawm a tih thu leh Mizoten hnam hmangaihna lama min thanharh tir leh tu atan leh midangte tana malsawmna lo ni thei se a duh thu a sawi.

Lal Zakapa Fanai biographical film zaninah Runmawi App-ah en theih tura chhawp chhuah a ni dawn. Kawhri lal, Zakapa Fanai chanchin hi kum 1839-1914 inkara thil thleng, British-in min awp hun lai a ni. Mizoten 'Marliana' an tih mai, hetih hun laia Superintendent MC Murray-a'n a bial a fannaa Mizo lal hnenah ran talh tur leh coolie a ngen thin bakah, zana mutpui tur nula ngen a ching thin bawk. 

Mah se, Lal Zakapa chuan nula a ngen chu lo pe ve duh loin, amah leh a khuaten an tawrh phah hial a ni. Hei vang hian Lal Zakapa hi Mizo hmeichhiate humhimtu anga sawi a ni ta a ni.

He film siamtu hi TC Vanlalzaua a ni a, Mizo film tana sulsutu hmasa zinga mi niin film pawh hi eng emaw zat a lo siam tawh a ni. Script writer chu Zoa hnamte a ni a, a document hi Zakapa Award Committee buatsaih a ni thung. 

State Tribal Resource & Training Centre (TRI), Directorate of Social Welfare & Tribal Aff airs, Govt of Mizoram leh Ministry of Tribal Affairs Govt. of Indiate puihna hmang a siam a ni.