Thlai thar pali kan lei dawn - Duhoma

ZPM chuan vawiin (21.8.2023) chhun khan an office-ah chhung inkhawm an hmanga, thusawitu ZPM Leader Lalduhoma chuan, 'Pathian leh mipui zarah kan sorkar chuan leiba tam tak kan chhawm dawn a, chuti chung chung chuan kan sum neih ang angin a kum khatnaah thlai thar pali kan lei dawn a, a rate tur pawh kan puang fel vek tawh, ' a ti. 

Lalduhoma chuan thlai leina atana support price ngai zat tur pawh mithiamten an chhutchhuak tawh tih sawiin, 'Heng thlai pali bakah hian Mizoten kan tharchhuah ve reng, a sawngbawlna kan neih loh vanga sum tam tak kalral thin - kuhva, panhnah leh buh-huma sum luangchhuak zawng zawngte Mizo ipteah a tam thei ang ber kan luhtir dawn a ni,' tiin Mzoten kuhva kan ei nasa a, a chin pawh kan ching ve viau mah se, kan la intodelh lo hle tih a sawi.

ZPM Leader sawi danin, an research wing-te chhut dan chuan kuhva hi kan thla thum ei vel chauh kan tharchhuak a, a dang zawng chu ram dang atanga kan lakluh a ni. Kan kuhva chinte hi a kung chawpin vaiin an lei a, chu chu Assam-ah thawnthlain skop-in an siam a, kan thar ngei mai kha manto takin kan lei leh thin.

Bawngkawn leh Zarkawtah ringawt pawh thlatina lo thleng thin hi bag 10,000 vel niin chu chu cheng nuai 550 man vel a ni a, kum khatah chuan nuai 6600 vel zet mai vaiin an rut a, a uiawm tham hle a ni.

Kuhva kan ei nasat avang hian intodelh dan dap a ngai a, a chin dan thlengin thlai dang nen hlawk zawka chin pawlh dan pawh kan ngaihtuah a ngai a ni. Farmer Producer Society an din vek ang a, chuta in register-te enkawltu tur service provider kan ruat ang a, sorkar hriatpuiin an kaihhruaina hnuaiah mumal zawkin an kal dawn.  Kan ramah a skop siam an tum ve ang a, hand holding hmangin theihtawp kan chhuah ang a, sum tam tak kan hum thei dawn a ni.

Kuhva hi ei tura siam bakah rawng siam nan an hmang a, heng lai hnaivai vaiho thlawhkhumin a company tak takte nen indawrin tangkai leh hlu leh zuala siam dan an zawng dawn.