CM hoin thlai thar lei sawiho

Vawiin (2.12.2024) chhun khan Mizoram Agricultural Marketing Board (MAMB) te chu Chief Minister Lalduhoma kaihhruaiin CM Conference Hall-ah an thukhawm a, hmuhphiah leitu turte nena inremna ziah dan tur an duang.

Meeting hian hmunphiah lei thei turte zawnna (expression of interest) a lo neih tawhna atanga sawrkar rate bituk zata lei thei tur firm-te nen season khat chhung inremna siam an remti. Buyer-ten an lei theih bak zawng chu sawrkarin lei mai se, tiin thutlukna an siam.

Sawrkarin thlai thar a lei turte hi support price pek ngai loa kalpui theih (support price aia sanga hralh theihna) ah chuan zalen taka lei leh hralh theih (open market) reng a ni. Support price hnuaia luhpui a tul hunah sawrkar ruahmanna anga kalpui tur a ni thung. 

Hmunphiah hi a hring chu support price pek a ni dawn lo a, a ro chauh support price siam a ni. Sawhthing leh aieng hi sawrkarin support price a pek theih hun chhung chu January - May inkar a ni a, Hmarcha leh Hmunphiahah January - March a ni. 

Support Price pek ngai lo chu zalen taka lei leh hralh kalpui theih reng niin support price pek ngaite erawh chu secondary collection centre-ah zel pek tur a ni. Tunah hian district tinah District Agricultural Marketing Committee (DAMC) hmalakna in heng secondary collection centre/auction centre hi siam fel mek a ni.

Sawrkarin support price a pekna tur chu heng secondary collection centre-ah zel hian a ni anga, khaw hrang hrangten sawrkar rate siam aia tlawma an khuaa an hralh duh pawhin phal vek a n. Mah se, support price chu heng sawrkarin a ruat collection centre-ah zel tur a ni a, a phurh thlenna transport cost chu sawrkar a sawi tel lo a, society-ten a tul angin an lo buaipui ang.