Land records hlan fel

District pathum Saitual, Hnahthial leh Khawzawl District-ah te Land Revenue & Settlement (LR&S) Department-in a taka hna an thawh thei nan heng district huam chhung khuaa land pass chi hrang hrang leh guard file-te  chu heng district pianchhuahna district atangin district thar DC office-ah hlan fel a ni.

Saitual District  land record-te chu Revenue Directorate, Aizawl leh Champhai SO Office atangten hlan niin, heng record-te hi Saitual DC Office-ah dah an ni. Hnahthial District land record-te chu Lunglei District atanga dawn niin, hengte hi Hnahthial DC office-ah lo dawnsawn a ni. Champhai SO office chuan Khawzawl leh  Saitual District land records an kawl angte chu heng district pahnih DC Office-ah an hlan.

LR&S Minister B Lalchhanzova chuan land records inhlan chu district tharah mipuiten LR&S Department an mamawhna a sanzia hriain, heng district pathumahte hian hna thawk thei tak tak tura thuam an tumna kal zel a nih thu sawiin, 'Land record inhlan phawt loh chuan mipui tan dawr theih an ni lo,' tiin land record-te hi district hlui lamah thliar fel hna hautak zet mai chu thawktute inpekna zarah hlen chhuah theih a nih thu a sawi.

Thawktu lam pawh district thar lamah hian dah belh zel an nih thu sawiin LR&S Minister chuan, 'A bul tan nan tunah a teloa awm theih loh staff tlem a zawng , hna thiam te dah an ni. Chief Minsiter-in Revenue Department a thawktu kan indaih loh dan hriain post hnawh khah kan dilte chu eng emaw zat phalsak kan ni. Heng hnate hi lak fel an nih hunah district thar bakah district dangahte pawh thawktu tam zawk in dah theih thuai kan beisei,' a ti.