Fair takin kan la - Legislative Assembly

Mizoram State Legislative Assembly hotute chuan tunhnaia an hna lak chu fair taka kalpui a nih thu an sawi a, 'Cancel chi a ni tawh loah kan ngai,' an ti.

Legislative Assembly hotute chuan tun tum an hna lakah tum danga an tih ngai loh angin pawn lam mi question an set tir thu Bengvarna an hrilh a, 'Health Department leh department dang tana question lo set tawh thin mi pahnih kan set tir,' tiin question set man a to tham deuh avangin general knowledge bik erawh anmahni chhunga miin a set thu an sawi.

Fair takin engkim an kalpui thu sawiin Legislative Assembly hotute chuan, 'Doctor hian doctor fa an nei duh khawp mai, chutiangin civil service-te pawhin civil service fa an nei duh. A chhan chu a kal hmang an hria a, an fate an zirtir thiam thin. Chutiangin Legislative Assembly lamah pawh a thawktute fa an tling ve leh thin. Hnaruak awm hun tur an hria a, an fate an inpuahchah hma theih phah a ni,' an ti.

MZP leh MSU phut anga an hna lak tawh an cancel dawn leh dawn loh zawhna chhangin Legislative Assembly hotute chuan, "Fair taka hna lak a nih avangin cancel ngam chi a ni tawh lo. Court-ah kal se kan tan chak ngaihna a awm lo. Dan lam hriate pawh kan rawn nasa,' tiin RTI Act hmanga zawhna pawh tha taka an chhan dawn thu an sawi.

Hetihlai hian MZP leh MSU chuan hna lak danah thil fel lo a awmin an hria a, ni 6.7.2023 hma-a cancel an phut. Cancel a nih loh chuan Legislative Assembly Secretariat kawtah zirlai an pungkhawm dawn.