MNF-in candidate tifel zel

MNF Nomination Committee tunhnaia thukhawm chuan kumin MLA inthlan lo awm tura an party candidate tur thenkhat an tifel ni a thudawn a ni.

Thudawnnain a tarlan danin, Rajya Sabha MP ni lai K Vanlalvena chu Aizawl South-II a ding tura tih niin, ZPM MLA C Lalsawivunga nen an inkhing ang. Aizawl South-II ah hian MNF atangin mi hrang hrang hming a lan hnuah, a lang lo ber K Vanlalvena a ding dawn.

Siaha Bialah chuan MADC MDC ni lai HC Lalmalsawma Zasai a ding dawn a, Lawngtlai West-ah chuan LADC CEM ni lai V Zirsanga dingin, West Tuipui Bialah chuan Prova dingin, Aizawl North-I ah chuan Tawi Bialtu MLA ni lai R Lalzirliana a ding ang.

AMC Corporator ni lai pahnih Mayor Lalrinenga Sailo leh Executive Councillor B Lalawmpuiite pawh an dinna tur bial tihfel a ni tawh. Lalrinenga Sailo chu Tawi Bialah dingin, B Lalawmpuii chu Aizawl East-II ah a ding ang.

MNF hian a hma lamin ZPM Leader Lalduhoma bial Serchhipa ding turin J Malsawmzuala Vanchhawng puan a lo ni tawh a, chumi hnuah Hachhek Bial ding turin Robert Romawia Royte puan leh a ni. Aizawl North-II a ding tur pawh tihfel tawh niin, Vanlalsawma (Sawmtea), Ramhlun Venglai a ding dawn.

MNF Bial ni lai Hrangturzo Bialtu MLA Lalchamliana chuan din tawh loh pawi a tih loh thu a lo sawi tawh a, ding leh tur nawrtu erawh an awm tho nia hriat a ni. He bialah hian he bial mi MNF Thalai Vice President hlui Lalremruata Chhangte hming a ri ring viau.

MNF hian MLA an neih lohna biala ding tur an tifel thawkhat tawh a, hriat theih chinah Palak, Tuichawng, Aizawl South-I, Aizawl West-III a ding tur an la ti fel lo deuh. Hming lang erawh an awm. CLP Leader Bial Thorangah chuan inthlan hmasa lama ding R Rohmingliana tho a din leh rin a ni.