ZPM-in an candidate puhna an sawifiah

ZPM Legal Department chuan vawiin (11.4.2024) hian press conference koin Lok Sabha MP inthlan tura an candidate Richard Vanlalhmangaiha an puhna an sawifiah a, David Sailo leh Tuesday Nightmare-i lakah criminal case file zui thuai an tum thu an sawi.

ZPM Legal Dept. hotute sawi danin, MAMCO Dy. Manager (Marketing) Lalremthanga leh MAMCO Consultant nia chhal Mustaqur Rahman, Guwahati-ten contract hna pek chungchanga inbumna case chinfel tawh, hremna pawh pek tawh kaihhnawihah ZPM MP Candidate sawi luhve talh tumna David Sailo inti pakhat thuziah chu social media-a nasa taka thehdarh a nih abakh Tuesdat Nightmare Youtube Channel chuan tutute emaw phone-a be kualin an inbiakna record thehdarh a ni. Tin, rinthu tlem belhchhahin, case pawh la kal mek anga sawi zuiin thehdarh a ni.

He case hi chinfel vek tawh niin, Lalremthanga hi ni 22.11.2022 khan thiam loh chantir a ni a, Mustaqur Rahman hi ni 6.2.2023 ah thiam loh chantir a ni thung. Case hi chinfel tawh leh tihtawp tawh a ni.

Richard Vanlalhmangaiha social media leh Toutuber pakhatin hmel tel hram an tumna chhan langsar ber chu affidavit-ah hming a sign ve tih a nih thu sawiin ZPM Legal Dept. chuan, 'MAMCO lam intiamkamna lehkha kha kan chhiar a nih chuan MAMCO account-a sum lut ngei tur anga tarlan a ni. Chuvangin Assistant Manager a nih angin Rihchard Vanlalhmangaiha khan a sign ve ngei tur pawh a ni,' ti an ti.

ZPM Legal Dept. chuan sum luhna erawh MAMCO account ni loin, Lalremthanga leh Mustaqur Rahman account a ni daih tih ACB-te'n an chhui chhuak leh vek thu sawiin, 'Pawisa vir vel dan zawng zawng chiang zawka kan hre duh a nih chuan court judgement & order ni 22.11.2022 leh ni 2.6.2023 ahte chiang takin tarlan a ni,'tiin affidavit-a hming sign ve chungchangah Richard Vanlalhmangaiha hi bum a nih zawk thu an sawi.

Rihcard Vanlalhmangaiha hi inhnamhnawihve ngei nise a lakah case siam sak lohna chhan tur engmah a awm lo tih sawiin ZPM Legal Dept. chuan, 'Ruling party thil tih theihna a nei han ti dawn ila, case in tan laia ruling party chu Congress Party an ni a, thubuai ngaihtuah chhoh hunlai vel hi MNF Party ruling lai niin, thutlukna siam a nih hunlai pawh MNF Party rorel hunlai tho a ni,'an ti.

ZPM Legal Dept. tarlan danin, Tuesday Nighmare Youtube channel-in phone call record a pho chhuah a 'an mi bum tam tak zinga pakhat thusawi chu han ngaihthlak sak ta zuai ila' a tiha mipa pakhat thusawiah khan 'Richie-a leh Pu Remthanga hi kan hlan thlap zel, an pahnih chiah zelin maw…' tikhan a sawi a ni. Tuesday Nightmare-i’n mi pakhat a tih hi Tlanghmingthanga ni ngeiin kan hria a, a ni hi MNF ruhkawl niin, mi thenkhat phei chuan Zoramthanga uite tihial in an sawi thin a ni. 

Tlanghmingthanga hi Mission Vengthlang mi hlun ni loin, mi inluaha khawsa thin niin, tunah chuan in hmunte leiin, a insak pawh a nep vak lo tih thu an dawng. A mimal chungchang erawh chu sawichhuak kher lo ila, eng emaw chen chu kan hre ve a ni. 

Court Judgement & Order date ni 2.06.2023 a para 7-a tarlan a nih dan chuan Kendriya Vidhyalaya Lunglei emaw Champhaia school building sakna tur contract in pek intiam in Rs. 25 Lakh chu Vanenga hian a thianpa Tlanghmingthanga, Mission Vengthlang nen Lalremthanga hi ni 10.03.2012 khan an pea. Contract hna hi an hmu lo a nih chuan thla tin 5% punga pawisa hi pek let an nih tur thu Lalremthanga hian a sawi bawk. 

Tichuan, ni 23.05.2012-ah Lalremthanga hian Rs. 40 lakh ngaihtuah/pe turin a ti leh a, Rs. 40 Lakh hi an neih theih loh avangin Rs. 20 Lakh chu Lalhmachhuana Despatch Rider Bank account (Vijay Bank) ah thun niin, Mustaqur Rahman Axis Bank Account-ah Rs. 20 Lakhs chu RTGS hmanga transfer leh nghal a ni. Tlanghmingthanga hian Lalremthanga leh Richard Vanlalhmangaiha te awmdun laia pawisa fai hlan fo thin anga a sawi hi Investigation Report leh Court Judgement atang hian dawt a sawi chiang hle a ni tih a hmuh theih a ni.

ZPM Legal Dept. chuan hetianga case chinfel tawh, thiam loh changte pawh hriat chian tawh leh hremna pawh pek tawh an nih laia case-a tel ve reng reng lo, politics inbeihna tenawm tak hmanga tih hmingchhiat tumna leh mipui ten duhthlanna fim hmang theilo tura dawt hmanga inpuhna tha an ti lo hle tih sawiin, ''Hetianga case chin fel vek tawh leh Special Court zahawm takin thuthlukna a siam fel tawh laia a ching pawr zawnga thu an lo vaivir kual hi court zahawmna tihbawrhbanna ah kan ngai, Court rorelna zah lohna ah kan ngai a ni,'an ti.

Press conference an neihah tawp san mai an tum loh thu sawiin ZPM Legal Dept. chuan, Kan bawh zui zel dawn . Criminal complaint pawh file zui thuai kan tum a ni. Thu dik lo ziak a, vawrhdarhtu leh mipui rilru hruai kawi tuma tawngkam thiam taka thudik lo vawr hdarh anih theih nana theihtawp chhuahtu leh thuhretu der nen inthuruala mipui bum tum leh MP Candidate tih hmingchhiat a, mipuiten an vote loh theih nana hmalatu lakah hian thubuai siamsak an nih theih ngei nan kan buaipui mek,'tiin vote thlak hun thlen hma ngeia case siam sak ngei an tum thu an sawi.